• మత్తు వదిలి మంచిగ బతకండి: డీఎస్పీ నంబూరు తిరుపతి రావు పిలుప
• డ్రగ్స్ మహమ్మారిపై పోలీసుల డేగకన్ను.. అక్రమ రవాణాపై తీవ్ర హెచ్చరిక
• మత్తు పదార్థాల సమాచారం ఇస్తే రూ.5,000 నజరానా: డీఎస్పీ ప్రకటన
• మహబూబాబాద్ జైల్లో డ్రగ్స్ వ్యతిరేక దినోత్సవం.. ఖైదీలచే ప్రతిజ్ఞ
మహబూబాబాద్: యువత మత్తు వదిలి మంచి మార్గంలో బతకాలని, డ్రగ్స్ రహిత తెలంగాణను సాధించడమే మనందరి లక్ష్యం కావాలని మహబూబాబాద్ డీఎస్పీ నంబూరు తిరుపతి రావు పిలుపునిచ్చారు. అంతర్జాతీయ మాదకద్రవ్యాల వ్యతిరేక దినోత్సవాన్ని పురస్కరించుకుని శుక్రవారంనాడు మహబూబాబాద్ సబ్ జైల్లో ప్రత్యేక కార్యక్రమాన్ని నిర్వహించారు. జైలర్ మల్లెల శ్రీనివాసరావు అధ్యక్షతన జరిగిన ఈ సదస్సులో డీఎస్పీ ముఖ్యఅతిథిగా పాల్గొని, తొలుత ఖైదీల చేత డ్రగ్స్ వ్యతిరేక ప్రతిజ్ఞ చేయించారు.
ఈ కార్యక్రమంలో ప్రముఖ సామాజిక సంస్థ సిటిజన్ ఫోరం ప్రతినిధి, సభ్యులు శంతన్ రామరాజు ప్రత్యేక ఆకర్షణగా నిలిచారు. సమాజంలో డ్రగ్స్ మహమ్మారిని తుదముట్టించేందుకు, యువతను సన్మార్గంలో పెట్టేందుకు సిటిజన్ ఫోరం ఎల్లప్పుడూ ముందుంటుందని ఆయన ఈ సందర్భంగా చాటిచెప్పారు. డ్రగ్స్ నిర్మూలనలో కేవలం పోలీసులే కాకుండా.. శంతన్ రామరాజు వంటి బాధ్యతాయుతమైన సామాజిక శక్తులు, సిటిజన్ ఫోరం సభ్యులు భాగస్వామ్యం కావడం పట్ల సదస్సులో హర్షం వ్యక్తమైంది.
అనంతరం డీఎస్పీ తిరుపతి రావు మాట్లాడుతూ.. డ్రగ్స్, గంజాయి లాంటి మత్తు పదార్థాలు యువతను నిర్వీర్యం చేస్తూ వారి భవిష్యత్తును అంధకారం చేస్తున్నాయని వాపోయారు. మత్తు పదార్థాలను ఏ రూపంలో సేవించినా, ఇతరులకు అమ్మినా లేదా రవాణా చేసినా చట్టప్రకారం తీవ్ర నేరంగా పరిగణించి కఠిన చర్యలు తీసుకుంటామని హెచ్చరించారు. గంజాయి సాగు, విక్రయాలపై పోలీస్ శాఖ నిరంతరం డేగకన్నుతో నిఘా ఉంచిందని స్పష్టం చేశారు.
డ్రగ్స్ రహిత సమాజం కోసం పౌరులంతా పోలీసులకు సహకరించాలని, ఎక్కడైనా డ్రగ్స్ ఆనవాళ్లు కనిపిస్తే వెంటనే సమాచారం అందించాలని డీఎస్పీ కోరారు. డ్రగ్స్ గురించిన సమాచారం ఇచ్చిన వారికి ఐదు వేల రూపాయల నజరానా (పారితోషికం) అందజేస్తామని, సమాచారం ఇచ్చిన వారి వివరాలను పూర్తిగా గోప్యంగా ఉంచుతామని భరోసా ఇచ్చారు. చైనా, మలేషియా దేశాల అభ్యర్థనతో ఐక్యరాజ్యసమితి తీర్మానం మేరకు 1988 నుండి జూన్ 26ను అంతర్జాతీయ డ్రగ్స్ వ్యతిరేక దినోత్సవంగా జరుపుకుంటున్నట్లు ఆయన వివరించారు.
కార్యక్రమం ముగింపులో గంజాయితో పాటు వివిధ నేరాలకు పాల్పడి జైల్లో ఉన్న ఖైదీలకు ప్రత్యేకంగా సూచనలు, సలహాలు ఇస్తూ కౌన్సిలింగ్ నిర్వహించారు. ఈ కార్యక్రమంలో సిటిజన్ ఫోరం సభ్యులు శంతన్ రామరాజుతో పాటు జైలు సిబ్బంది మహ్మద్ ఖళీళ్, ఎమ్మెనో లక్ష్మన్, మోటపోతుల వీరన్న, పోషిని జనార్దన్, రామాంజనేయులు, నర్సింహారావు మరియు జైలు ఖైదీలు పెద్ద సంఖ్యలో పాల్గొన్నారు.
