♦ ఒరిస్సా టు మహబూబాబాద్.. ఆటోలో గంజాయి తరలిస్తూ దొరికిపోయిన నిందితుడు
♦ పాల్వంచ సంజయ్ నగర్ వద్ద పట్టుబడ్డ 28.9 కేజీల గంజాయి.. ఆటో స్వాధీనం
♦ గంజాయి స్మగ్లర్ ఉప్పుగుండ్ల ప్రభాకర్ను అరెస్ట్ చేసిన పాల్వంచ పోలీసులు
♦ పాల్వంచలో భారీగా గంజాయి పట్టివేత: మరో ఇద్దరు నిందితుల కోసం పోలీసుల గాలింపు
భద్రాద్రి కొత్తగూడెం జిల్లా పాల్వంచ పట్టణ పరిధిలో పోలీసులు ఈరోజు జరిపిన వాహన తనిఖీల్లో భారీగా గంజాయి పట్టుబడింది. పాల్వంచ పట్టణ పరిధిలోని ప్రియదర్శిని కాలనీకి చెందిన ఉప్పుగుండ్ల ప్రభాకర్ అనే వ్యక్తి ఒరిస్సా రాష్ట్రం కలిమెల నుండి మహబూబాబాద్కు ఆటోలో అక్రమంగా గంజాయిని తరలిస్తున్నట్లు పోలీసులకు పక్కా సమాచారం అందింది.
దీనితో రంగంలోకి దిగిన పాల్వంచ పట్టణ పోలీసులు సంజయ్ నగర్ వద్ద ప్రత్యేకంగా నిఘా పెట్టి వాహన తనిఖీలు చేపట్టారు. ఈ క్రమంలో అనుమానాస్పదంగా వచ్చిన ఆటోను ఆపి సోదా చేయగా.. అందులో తరలిస్తున్న సుమారు ₹14,45,000 (పద్నాలుగు లక్షల నలభై ఐదు వేల రూపాయలు) విలువ కలిగిన 28.9 కేజీల గంజాయి బయటపడింది.
వెంటనే స్పందించిన పోలీసులు గంజాయిని స్వాధీనం చేసుకోవడంతో పాటు, నిందితుడు ఉప్పుగుండ్ల ప్రభాకర్ వద్ద నుండి ₹34,000 నగదు, ఒక సెల్ ఫోన్ మరియు రవాణాకు ఉపయోగించిన ఆటోను సీజ్ చేశారు. ఈ అంతర్రాష్ట్ర గంజాయి రవాణా ముఠాలో ప్రభాకర్తో పాటు మరికొందరి హస్తం ఉన్నట్లు పోలీసులు గుర్తించారు.
- ఈ ఘటనపై పాల్వంచ పట్టణ పోలీసులు కేసు నమోదు చేసి నిందితుడిని విచారిస్తున్నారు. అలాగే ఈ కేసులో సంబంధం ఉండి, ప్రస్తుతం పరారీలో ఉన్న మరో ఇద్దరు నిందితుల కోసం ప్రత్యేక బృందాలతో గాలింపు చర్యలు ముమ్మరం చేసినట్లు పట్టణ పోలీస్ అధికారులు వెల్లడించారు.
