ఉప ముఖ్యమంత్రికి వినతిపత్రం సమర్పణ:
భద్రాద్రి కొత్తగూడెం జిల్లా ఇల్లందు మండలం రొంపేడు పర్యటనకు విచ్చేసిన తెలంగాణ రాష్ట్ర ఉప ముఖ్యమంత్రి, ఆర్థిక మరియు విద్యుత్ శాఖ మంత్రివర్యులు భట్టి విక్రమార్కను విజయలక్ష్మినగర్ సర్పంచ్ చాందావత్ రమేష్ బాబు, తిలక్ నగర్ సర్పంచ్ ధనసరి స్రవంతి మరియు అఖిలపక్ష నాయకులు మర్యాదపూర్వకంగా కలుసుకున్నారు. ఈ సందర్భంగా విజయలక్ష్మినగర్ గ్రామ పంచాయితీ పరిధిలో నెలకొన్న పలు దీర్ఘకాలిక సమస్యలను పరిష్కరించాలని కోరుతూ వారికి ఒక సమగ్ర వినతిపత్రాన్ని అందజేశారు.
సింగరేణి నిర్లక్ష్యంపై ఆవేదన:
భారతదేశంలోనే మొట్టమొదటిసారిగా బొగ్గు నిక్షేపాలను కనుగొన్న చారిత్రాత్మక ప్రాంతం ఇల్లందు అని, అలాంటి ప్రాంతం నేడు తీవ్ర వెనుకబాటుతనానికి గురవ్వడం బాధాకరమని సర్పంచ్లు రమేష్ బాబు, స్రవంతి ఆవేదన వ్యక్తం చేశారు. సింగరేణి సంస్థ ఇక్కడి నుండి పెద్ద ఎత్తున బొగ్గు నిక్షేపాలను తరలించుకుపోయినప్పటికీ, స్థానిక ప్రాంత అభివృద్ధిని పూర్తిగా నిర్లక్ష్యం చేసిందని మండిపడ్డారు. ప్రస్తుత పరిస్థితుల్లో ఇక్కడ స్థానిక కార్మికులే కనుమరుగైపోయే పరిస్థితి ఏర్పడిందని వారు డిప్యూటీ సీఎం దృష్టికి తీసుకెళ్లారు.
ఓసీ భూబాధితులకు న్యాయం, ఉపాధి అవకాశాలు:
నూతనంగా తవ్వుతున్న ఓపెన్ కాస్ట్ (ఓసీ) గనుల వల్ల భూములు కోల్పోతున్న అర్హులైన ప్రతి ఒక్కరికీ తక్షణమే ఆర్ అండ్ ఆర్ (పునరావాస) ప్యాకేజీ అందించి న్యాయం చేయాలని నాయకులు డిమాండ్ చేశారు. ఓసీ ప్రభావం లేని మిగతా భూములను రెవెన్యూ శాఖకు అప్పగించి, స్థానికులందరికీ ఇళ్ల పట్టాలు ఇవ్వాలని కోరారు. సింగరేణి సంస్థ ద్వారానే ఈ ప్రాంతాన్ని పూర్తిస్థాయిలో అభివృద్ధి చేయాలని, స్థానిక నిరుద్యోగ యువతకు పెద్ద ఎత్తున ఉద్యోగ, ఉపాధి అవకాశాలు కల్పించాలని డిప్యూటీ సీఎంను ప్రత్యేకంగా అభ్యర్థించారు.
క్వార్టర్ల నివాసితులకు గృహజ్యోతి పథకం వర్తింపు:
విజయలక్ష్మినగర్ పంచాయితీ పరిధిలోని శిథిలావస్థకు చేరిన సింగరేణి చీఫ్ క్వార్టర్లలో నివసిస్తున్న నిరుపేద రోజువారీ కూలీల సమస్యలను మంత్రి దృష్టికి తీసుకెళ్లారు. ప్రస్తుతం ఈ క్వార్టర్లకు సింగరేణి సంస్థ ఇండస్ట్రియల్ పవర్ చార్జీలను వసూలు చేస్తుండటం వల్ల పేదలపై తీవ్ర ఆర్థిక భారం పడుతోందని వివరించారు. కాబట్టి సింగరేణి యాజమాన్యంతో మాట్లాడి ఆ విద్యుత్ను తొలగించి, ప్రభుత్వ విద్యుత్ కనెక్షన్లు ఇచ్చి ‘గృహజ్యోతి’ పథకం వర్తింపజేయాలని, అలాగే ఎన్నో ఏళ్లుగా ఉంటున్న అర్హులైన పేదలకే ఆ క్వార్టర్లను కేటాయించాలని కోరారు.
రోడ్లు, మౌలిక వసతుల కల్పనకు డిమాండ్:
విజయలక్ష్మినగర్ పంచాయితీ ఇల్లందు పట్టణానికి అత్యంత సమీపంలో ఉన్నప్పటికీ సరైన రహదారులు లేక ప్రజలు, ముఖ్యంగా వృద్ధులు తీవ్ర ఇబ్బందులు పడుతున్నారని వారు తెలిపారు. ఆటోలు కూడా మెయిన్ రోడ్డు వరకే వస్తుండటంతో కాలినడకన వెళ్లాల్సి వస్తోందని, కాబట్టి వెంటనే నూతన రోడ్లు మంజూరు చేయాలని కోరారు. అలాగే పంచాయితీ పరిధిలోని పలు ప్రభుత్వ భవనాలకు కాంపౌండ్ వాల్స్ నిర్మించాలని, నాలుగు వార్డుల్లో గృహజ్యోతి పథకాన్ని అమలు చేయాలని విజ్ఞప్తి చేశారు. ఈ కార్యక్రమంలో కాంగ్రెస్ పార్టీ జిల్లా కార్యదర్శి ఎట్టి హరికృష్ణ, మాజీ ఎంపీటీసీ పూనెం సురేందర్, వార్డు మెంబర్ శ్రీకాంత్, గుళ్ల సదా, ధనసరి రాజు, సురేష్, రాకేష్, ఉపేందర్ తదితరులు పాల్గొన్నారు.
