♦ 138 ఏళ్ల ఘన చరిత్ర కలిగిన సింగరేణి ప్యాసింజర్ను వెంటనే పునరుద్ధరించాలి: కంచర్ల డిమాండ్
♦ ఇల్లందు నుండి డోర్నకల్ మధ్య 3 పూటలా రైలు నడపాలని ఉద్యమకారుడు కంచర్ల శ్రీనివాస్ రావు పట్టు
♦ రైల్వే అధికారులు, కేంద్ర ప్రభుత్వం, సింగరేణి యాజమాన్యం వెంటనే స్పందించాలి
♦ బ్రిటిష్, నిజాంల కాలంలో వెలిగిన ఇల్లందు రైల్వే నేడు గమ్యం లేని స్థితిలో పడటం దారుణం
ప్యాసింజర్ పునర్జీవం పొందేనా..? ఇల్లందు ప్యాసింజర్ కోసం కంచర్ల శ్రీనివాస్ రావు నిరాహార దీక్ష
భారతీయ రైల్వే చరిత్రలో దాదాపు 138 ఏళ్ల ఘన చరిత్ర కలిగిన ఇల్లందు (సింగరేణి) ప్యాసింజర్ రైలును వెంటనే పునరుద్ధరించాలని డిమాండ్ చేస్తూ తెలంగాణ మలిదశ ఉద్యమకారుడు కంచర్ల శ్రీనివాస్ రావు నిరాహార దీక్ష చేపట్టారు. ఇల్లందు నుండి డోర్నకల్ మధ్య రోజుకు మూడు పూటలా ఈ రైలును నడపాలని ఆయన స్పష్టం చేశారు.
గతంలో తెలంగాణ మలిదశ ఉద్యమకారుడిగా, రజక సంఘం రాష్ట్ర మాజీ ఉపాధ్యక్షుడిగా, రాష్ట్ర మాజీ కార్యదర్శిగా మరియు ఇల్లందు రజక సంఘం మాజీ అధ్యక్షుడిగా బాధ్యతలు నిర్వహించిన కంచర్ల శ్రీనివాస్ రావు ప్రజా సమస్యలపై నిరంతరం పోరాడుతున్నారు. తాజాగా ఇల్లందు రైల్వే స్టేషన్ పూర్వ వైభవం కోసం, ప్యాసింజర్ రైలు పునరుద్ధరణ కోసం ఆయన ఈ నిరాహార దీక్షకు దిగారు.
ఈ సందర్భంగా కంచర్ల శ్రీనివాస్ రావు మాట్లాడుతూ.. ఇల్లందు రైల్వే స్టేషన్కు ఎంతో చారిత్రక ప్రాధాన్యం ఉందని గుర్తుచేశారు. ఒకప్పుడు బొగ్గు రవాణాతో పాటు వేలాది మంది ప్రయాణికులను సురక్షితంగా గమ్యస్థానాలకు చేర్చిన ఈ స్టేషన్, నేడు పాలకుల నిర్లక్ష్యం వల్ల గమ్యస్థానమే లేని స్థితికి చేరుకోవడం బాధాకరమన్నారు.
1871లో బ్రిటిష్ పాలకులు ఇల్లందు ప్రాంతంలో బొగ్గు నిల్వలను గుర్తించారని, ఆ బొగ్గును తరలించడానికి 1888లోనే డోర్నకల్ నుండి ఇల్లందుకు మొదటి రైల్వే లైన్ నిర్మించారని కంచర్ల శ్రీనివాస్ రావు వివరించారు. నాటి నిజాం పాలకులు (NGSR – నిజాంస్ గవర్నమెంట్ స్టేట్ రైల్వే) పేరిట ఈ స్టేషన్కు ‘సింగరేణి కాలరీస్’ అని నామకరణం చేసి నడిపించిన చరిత్ర మనకు ఉందన్నారు.
అప్పట్లో ఇల్లందులో ఉత్పత్తి అయిన బొగ్గును డోర్నకల్ మీదుగా నాటి బెజవాడ (విజయవాడ)తో పాటు మద్రాస్, కలకత్తా వంటి మహానగరాలకు రవాణా చేసేవారని ఆయన తెలిపారు. బొగ్గు గనుల్లో పనిచేసే కార్మికులను, ఇతర ప్రాంతాల ప్రజలను తరలించేందుకు నాడే ప్యాసింజర్ రైలును అందుబాటులోకి తెచ్చారని గుర్తుచేశారు.
కాలక్రమేణా బెల్లంపల్లి ప్రాంతంలో కూడా బొగ్గు నిల్వలు వెలికితీయడంతో, కార్మికులు మరియు ప్రజల రవాణా సౌకర్యార్థం ఇల్లందు నుండి బెల్లంపల్లి వరకు ‘సింగరేణి ప్యాసింజర్’ పేరిట రైలును ఏర్పాటు చేశారని కంచర్ల శ్రీనివాస్ రావు పేర్కొన్నారు.
మొదట బొగ్గు ఇంజన్తో నడిచిన ఈ సింగరేణి ప్యాసింజర్, కాలక్రమేణా ఎలక్ట్రికల్ ఇంజన్ స్థాయికి చేరుకుందని.. ఇల్లందు నుండి బయలుదేరే ఈ రైలు ద్వారా ప్రయాణికులు డోర్నకల్ చేరుకుని అక్కడ నుండి విజయవాడ మరియు ఇతర దూర ప్రాంతాలకు వెళ్లేవారని ఆయన తెలిపారు.
ఆనాడు బ్రిటిష్ పాలకులు, నిజాం పాలకులు సాంకేతికంగా సవాళ్లు ఉన్న కాలంలోనే రైల్వే రవాణాను సమర్థవంతంగా నిర్వహించారని.. కానీ నేటి మన పాలకులకు అది ఎందుకు సాధ్యం కావడం లేదని కంచర్ల శ్రీనివాస్ రావు ప్రశ్నించారు.
రాష్ట్ర పాలకులకు పట్టకపోవడం, కేంద్ర పాలకులకు గిట్టకపోవడం వల్లనే ఇంతటి ఘన చరిత్ర ఉన్న ఇల్లందు ప్యాసింజర్ నేడు మూలనపడిందని కంచర్ల శ్రీనివాస్ రావు తీవ్ర ఆగ్రహం వ్యక్తం చేశారు.
ఈ ప్రాంత ప్రజలు, కార్మికులు మరియు విద్యార్థుల ఇబ్బందులను పరిగణనలోకి తీసుకుని రైల్వే అధికారులు, కేంద్ర ప్రభుత్వం మరియు సింగరేణి యాజమాన్యం తక్షణమే స్పందించాలని ఆయన డిమాండ్ చేశారు.
ఇల్లందు నుండి డోర్నకల్ వరకు రోజుకు 3 పూటలా ప్యాసింజర్ రైలును పునరుద్ధరించే వరకు తన నిరాహార దీక్ష మరియు పోరాటం ఆగదని కంచర్ల శ్రీనివాస్ రావు తేల్చి చెప్పారు.
సామాన్యుల రవాణా కష్టాలను తీర్చడానికి సింగరేణి ప్యాసింజర్కు మళ్లీ పునర్జీవం పోయాల్సిన బాధ్యత అధికారులపై ఉందన్నారు.
ఇల్లందు చారిత్రక వారసత్వాన్ని, రైల్వే వ్యవస్థను కాపాడుకోవడానికి ప్రతి ఒక్కరూ ఈ ఉద్యమంలో కలిసి రావాలని కంచర్ల శ్రీనివాస్ రావు పిలుపునిచ్చారు.
తక్షణమే సంబంధిత అధికారులు సానుకూల నిర్ణయం తీసుకోకపోతే ఆందోళనను మరింత తీవ్రతరం చేస్తామని కంచర్ల శ్రీనివాస్ రావు హెచ్చరించారు.
