రైల్వే లైన్ సాధన దీక్షకు టిడిపి సంఘీభావం.. కంచర్ల శ్రీనివాస్కు ధన్యవాదాలు తెలిపిన నాయకుల
స్వతంత్రానికి ముందే రైలు నడిచిన చరిత్ర ఇల్లందుది: విజయలక్ష్మి నగర్ సర్పంచ్ చాందావత్ రమేష్ బాబు
ఇల్లందు రైల్వే సాధన కోసం అందరూ నడుం బిగించాలి: తెలుగుదేశం పార్టీ నాయకుల పిలుపు
ఇల్లందు పరిరక్షణ పోరాటంలో టిడిపి భాగస్వామ్యం ఉంటుంది: ముద్రగడ వంశీ స్పష్టీకరణ
తెలుగుదేశం పార్టీ ఇల్లందు నియోజకవర్గ కోఆర్డినేటర్ ముద్రగడ వంశీ ఆధ్వర్యంలో నాయకులు ఇల్లందు రైల్వే లైన్ పునరుద్ధరణకై దీక్ష చేపట్టిన కంచర్ల శ్రీనివాస్ను కలసి పూర్తి సంఘీభావం ప్రకటించారు. ఇల్లందు పట్టణానికి చారిత్రక ప్రాధాన్యం కలిగిన రైల్వే లైన్ను వెంటనే పునరుద్ధరించాలని ఈ సందర్భంగా వారు డిమాండ్ చేశారు.
ఈ కార్యక్రమం లో టిడిపి నేత ముద్రగడ వంశీతో పాటు విజయలక్ష్మి నగర్ సర్పంచ్ చాందావత్ రమేష్ బాబు పాల్గొని మాట్లాడారు. బొగ్గు గనులకు పుట్టినిల్లైన ఇల్లందులో స్వతంత్రానికి పూర్వం నుంచే రైలు రవాణా సాగేదని, అలాంటి సుదీర్ఘ ఘన చరిత్ర కలిగిన ప్రాంతంలో రైల్వే సేవలను నిలిపివేయడం ఏమాత్రం తగదని వారు ఆవేదన వ్యక్తం చేశారు.
ఉమ్మడి ఆంధ్రప్రదేశ్ రాష్ట్రంలో తెలుగుదేశం పార్టీ అధికారంలో ఉన్న సమయంలోనే ఇల్లందు రైల్వే స్టేషన్ను మూసివేయాలనే ప్రతిపాదనలు వచ్చాయని నాయకులు గుర్తుచేశారు. అయితే అప్పటి వాజపేయి నేతృత్వంలోని కేంద్ర ప్రభుత్వంలో టీడీపి ఎంపీ సముద్రాల వేణుగోపాలాచారి చొరవ తీసుకుని ఆ ప్రయత్నాలను అడ్డుకున్నారని స్పష్టం చేశారు.
1996 నుండి 2004 వరకు ఎంపీగా ఉన్న సముద్రాల వేణుగోపాలాచారి కేంద్ర మంత్రి సిన్హాతో మాట్లాడి రైల్వే స్టేషన్ మూసివేత ప్రతిపాదనను నిలిపివేశారని తెలిపారు. అయితే 2004లో తెలుగుదేశం పార్టీ అధికారం కోల్పోయిన తర్వాత తదనంతర పరిణామాల్లో ఈ రైల్వే లైన్ సేవలు పూర్తిగా నిలిచిపోయాయని నాయకులు విచారం వ్యక్తం చేశారు.
ఇప్పటికైనా కేంద్ర, రాష్ట్ర ప్రభుత్వాలు తక్షణమే స్పందించి ఇల్లందు రైల్వే లైన్ను పునరుద్ధరించాలని ముద్రగడ వంశీ కోరారు. ఇల్లందు ప్రజల సంక్షేమం, ప్రాంతీయ అభివృద్ధిని కాంక్షిస్తూ ఈ ముఖ్యాంశాన్ని ముందుకు తీసుకువచ్చిన కంచర్ల శ్రీనివాస్కు తెలుగుదేశం పార్టీ తరఫున ప్రత్యేక ధన్యవాదాలు తెలియజేశారు.
ఇల్లందు పట్టణ పరిరక్షణ మరియు రైల్వే లైన్ సాధన కోసం కంచర్ల శ్రీనివాస్ నేతృత్వంలో తీసుకునే ఏ నిర్ణయానికైనా తెలుగుదేశం పార్టీ పూర్తి స్థాయిలో భాగస్వామ్యం అవుతుందని నాయకులు హామీ ఇచ్చారు. ఈ పోరాటంలో పార్టీ శ్రేణులు ముందంజలో ఉంటాయని తెలిపారు.
చారిత్రక ప్రాధాన్యం ఉన్న ఈ రైల్వే లైన్ పునరుద్ధరణ ఉద్యమంలో ఇల్లందు పట్టణంతో పాటు పరిసర ప్రాంతాల ప్రజలు, అన్ని వర్గాల వారు నడుం బిగించి ముందుకు రావాలని నాయకులు పిలుపునిచ్చారు. అందరం కలిసికట్టుగా పోరాడి రైల్వే లైన్ సాధించుకుందామని ఉద్బోధించారు.
ఈ సంఘీభావ కార్యక్రమంలో సీనియర్ నాయకులు గౌరిశెట్టి పురుషోత్తం, శ్యామ్ తీవరి, కారు నర్సన్న, మైపా బాలరాజు, వేమూరు సాల్మన్ రాజ్, కంది రవి, దగ్గు లింగయ్య, కోపల్లి రవి, గోగ్గల రాజేష్, అప్పల రాకేష్, రాజు, రహీమ్ పాషా తదితరులు పెద్ద సంఖ్యలో పాల్గొన్నారు.
