నాలుగు దశాబ్దాల ప్రస్థానంలో జియో టెక్నికల్ సర్వీసెస్
–నాణ్యత, నమ్మకంతో 40 ఏళ్ల సేవలు.. 10,000కు పైగా ప్రాజెక్టుల పూర్తి.
హైదరాబాద్ సిటీ ప్రతినిధి నాగుల అంజిబాబు, అక్టోబర్ 11, (జన సంఘర్షణ): భూగర్భ శాస్త్రం, మట్టి పరిశోధన, జియోటెక్నికల్ ఇంజనీరింగ్, అన్వేషణాత్మక కోర్ డ్రిల్లింగ్ రంగాల్లో విశేష సేవలందిస్తున్న జియో టెక్నికల్ సర్వీసెస్ (జీటీఎస్), హైదరాబాద్ సంస్థ 40 ఏళ్ల సేవా ప్రస్థానాన్ని పూర్తి చేసుకుంది. 1986లో స్థాపించబడిన ఈ సంస్థ 2026 నాటికి నాలుగు దశాబ్దాల ప్రయాణాన్ని పూర్తి చేసుకొని, ఐదవ దశాబ్దంలోకి అడుగుపెడుతోంది.
చిన్న సంస్థగా ప్రారంభమై.. సాంకేతిక రంగంలో ప్రత్యేక గుర్తింపు:
ఇస్వి మధుసూదన్ రెడ్డి 1986లో పరిమిత సాంకేతిక సిబ్బంది, ఆర్థిక వనరులతో జియో టెక్నికల్ సర్వీసెస్‌ను ప్రారంభించారు. ప్రారంభ దశలో ఎదురైన అనేక సవాళ్లను అధిగమిస్తూ, నాణ్యత, నైతికత, సాంకేతిక విశ్వసనీయతకు ప్రాధాన్యమిచ్చి సంస్థను అభివృద్ధి చేశారు. ప్రస్తుతం చీఫ్ కన్సల్టెంట్‌గా ఆయన మార్గదర్శకత్వంలో సంస్థ వివిధ రంగాలకు తన సేవలను విస్తరిస్తోంది.
10,000కు పైగా ప్రాజెక్టులు పూర్తి:
తెలంగాణ, ఆంధ్రప్రదేశ్‌తో పాటు దేశంలోని పలు రాష్ట్రాల్లో జీటీఎస్ తన సేవలను అందించింది. సంస్థ వివరాల ప్రకారం, గత నాలుగు దశాబ్దాల్లో 10,000కు పైగా ప్రాజెక్టులను విజయవంతంగా పూర్తి చేసింది. అన్వేషణాత్మక కోర్ డ్రిల్లింగ్, మట్టి పరిశోధనలు, జియోటెక్నికల్ అధ్యయనాలు, ఫౌండేషన్ పరిశీలనలు, మట్టి–శిలల విశ్లేషణ వంటి విభాగాల్లో ప్రత్యేక నైపుణ్యాన్ని సాధించింది.ఆధునిక పరీక్షా పరికరాలు, అనుభవజ్ఞులైన ఫీల్డ్ బృందాలు, క్షేత్రస్థాయి పరిస్థితులకు అనుగుణంగా సాంకేతిక పరిజ్ఞానాన్ని వినియోగించడం సంస్థ విజయానికి ప్రధాన కారణాలుగా నిలిచాయి. ప్రముఖ నిపుణులైన డా. బాబూరావు, ఉస్మానియా విశ్వవిద్యాలయం సివిల్ ఇంజనీరింగ్ విభాగ మాజీ ప్రొఫెసర్, పి.వి. నారాయణరావు తదితరుల సహకారం సంస్థ సాంకేతిక సేవలకు మరింత బలాన్ని చేకూర్చిందని సంస్థ పేర్కొంది.
ప్రముఖ సంస్థల గుర్తింపు:
జీటీఎస్‌కు దక్షిణ మధ్య రైల్వే, దక్షిణ పశ్చిమ రైల్వే, ఆంధ్రప్రదేశ్ రాష్ట్ర భూగర్భజల శాఖ, రైట్స్ లిమిటెడ్, సింగరేణి కాలరీస్ కంపెనీ లిమిటెడ్ వంటి సంస్థలతో ఎంపానెల్‌మెంట్ లభించింది. మౌలిక సదుపాయాలు, రైల్వేలు, నీటి వనరులు, విద్యుత్, గనులు, పట్టణాభివృద్ధి వంటి కీలక రంగాలకు సంబంధించిన ప్రాజెక్టుల్లో జియోటెక్నికల్ పరిశోధనల ప్రాధాన్యం పెరుగుతున్న నేపథ్యంలో ఈ గుర్తింపులు సంస్థకు విశిష్టతను చేకూర్చాయి.
వ్యవస్థాపకుడి దూరదృష్టికి నిదర్శనం: జీటీఎస్ 40 ఏళ్ల ప్రస్థానం వ్యవస్థాపకుడు శ్రీ ఇస్వి మధుసూదన్ రెడ్డి దూరదృష్టి, పట్టుదల, అంకితభావానికి నిదర్శనంగా నిలుస్తోంది. సాంకేతిక నైపుణ్యాన్ని వ్యాపార దృక్పథంతో సమన్వయం చేస్తూ సంస్థను అభివృద్ధి చేయడంలో ఆయన కీలక పాత్ర పోషించారు.ఐదవ దశాబ్దంలోకి అడుగుపెడుతున్న సందర్భంగా కూడా నాణ్యత, వృత్తిపరమైన నైతిక విలువలు, క్లయింట్ల విశ్వాసం, దేశ మౌలిక సదుపాయాల అభివృద్ధికి తోడ్పాటు వంటి మూల సూత్రాలతో ముందుకు సాగడమే తమ లక్ష్యమని సంస్థ ప్రతినిధులు తెలిపారు.
