- లేఅవుట్ సర్వే నివేదిక జారీకి లంచం డిమాండ్‌.. ఇద్దరు రెవెన్యూ అధికారుల అరెస్ట్‌
రంగారెడ్డి జిల్లా / అక్టోబర్ 12 / (జన సంఘర్షణ):
రంగారెడ్డి జిల్లా అబ్దుల్లాపూర్‌మెట్‌ మండలంలో లంచం వ్యవహారానికి సంబంధించి తహసీల్దార్, మండల సర్వేయర్ అవినీతి నిరోధక శాఖ (ఏసీబీ) అధికారులకు పట్టుబడ్డారు. లేఅవుట్‌కు సంబంధించి హెచ్‌ఎండీఏ నిబంధనల ప్రకారం సర్వే నిర్వహించి, జాయింట్‌ ఇన్‌స్పెక్షన్‌ సర్వే నివేదిక జారీ చేసేందుకు లంచం డిమాండ్‌ చేసినట్లు ఏసీబీ అధికారులు వెల్లడించారు.
*రూ.30 లక్షల నుంచి రూ.20 లక్షలకు తగ్గింపు..!!!!*
ఏసీబీ వెల్లడించిన వివరాల ప్రకారం.. అబ్దుల్లాపూర్‌మెట్‌ మండల సర్వేయర్ బతుక శ్రీనివాసులు (ఏఓ-1), తహసీల్దార్ బి. సుదర్శన్‌ రెడ్డి (ఏఓ-2) ఈ కేసులో ఆరోపణలు ఎదుర్కొంటున్నారు. ఫిర్యాదుదారుడికి సంబంధించిన అధికారిక పనిని పూర్తి చేసేందుకు తొలుత రూ.30 లక్షలు లంచంగా డిమాండ్‌ చేసి, అనంతరం ఆ మొత్తాన్ని రూ.20 లక్షలకు తగ్గించినట్లు అధికారులు తెలిపారు.
ఈ వ్యవహారంపై చర్యలు చేపట్టిన ఏసీబీ అధికారులు ఇద్దరు అధికారులను అరెస్ట్‌ చేసినట్లు వెల్లడించారు. వారిని హైదరాబాద్‌లోని నాంపల్లిలో ఉన్న ప్రత్యేక ఏసీబీ కోర్టు న్యాయమూర్తి ఎదుట హాజరుపరచనున్నట్లు తెలిపారు. కేసుకు సంబంధించి దర్యాప్తు కొనసాగుతోందని పేర్కొన్నారు. ఫిర్యాదుదారుడి భద్రత దృష్ట్యా ఆయన వ్యక్తిగత వివరాలను గోప్యంగా ఉంచినట్లు వెల్లడించారు.
*లంచం డిమాండ్‌ చేస్తే 1064కు ఫిర్యాదు చేయండి..!!!!*
ప్రభుత్వ కార్యాలయాల్లో ఎవరైనా అధికారులు లంచం డిమాండ్‌ చేస్తే ప్రజలు భయపడకుండా అవినీతి నిరోధక శాఖకు ఫిర్యాదు చేయాలని తెలంగాణ ఏసీబీ సూచించింది.
*ఫిర్యాదు చేసేందుకు అందుబాటులో ఉన్న మార్గాలు:..!!!*
*ఏసీబీ టోల్‌ఫ్రీ నంబర్‌: 1064…!!!!*
*వాట్సాప్‌ నంబర్‌: 9440446106…!!!*
*ఫేస్‌బుక్‌: Telangana ACB…!!!*
*ఎక్స్‌ (గతంలో ట్విట్టర్‌): @TelanganaACB..!!!!*
ప్రభుత్వ కార్యాలయాలు, ముఖ్యమైన బహిరంగ ప్రదేశాల్లో ఏసీబీని సంప్రదించేందుకు క్యూఆర్‌ కోడ్‌లను ఏర్పాటు చేసినట్లు కూడా అధికారులు తెలిపారు.
*ఫిర్యాదుదారుల వివరాలు గోప్యంగా…!!*.
లంచం డిమాండ్‌కు గురైన బాధితులు, ఫిర్యాదుదారులు ధైర్యంగా ముందుకు వచ్చి ఫిర్యాదు చేయాలని ఏసీబీ విజ్ఞప్తి చేసింది. ఫిర్యాదు చేసే వారి పేర్లు, వ్యక్తిగత వివరాలను గోప్యంగా ఉంచుతామని స్పష్టం చేసింది.
ప్రభుత్వ విధులు నిర్వహించే సమయంలో లంచం డిమాండ్‌ చేయడం చట్టవిరుద్ధం. ఇలాంటి ఘటనలు ఎదురైనప్పుడు ప్రజలు ఏసీబీని సంప్రదించి ఫిర్యాదు చేయవచ్చు. అవినీతిని అరికట్టడంలో ప్రజల సహకారం కీలకం.
