* పత్తి పంటలో అంతర పంటగా 400 గంజాయి మొక్కలు.. రూ.12 లక్షల విలువైన మొక్కలు స్వాధీనం
* భార్యాభర్తలతో పాటు మరో వ్యక్తి అరెస్ట్.. మాదకద్రవ్యాలపై కఠిన చర్యలు తప్పవని డీఎస్పీ హెచ్చరిక
కామారెడ్డి జిల్లా, సెప్టెంబర్ 18 (జనసంఘర్షణ): అధిక లాభాలు వస్తాయనే ఆశతో పత్తి పంటలో అంతర పంటగా అక్రమంగా గంజాయి సాగు చేస్తున్న ఘటనను గాంధారి పోలీసులు గుర్తించి భగ్నం చేశారు. గాంధారి మండలం తుమ్మల శివారులోని వ్యవసాయ భూముల్లో సాగు చేస్తున్న సుమారు 400 గంజాయి మొక్కలను పోలీసులు వ్యవసాయ శాఖ అధికారులతో కలిసి నిర్వహించిన తనిఖీల్లో గుర్తించారు. వాటిని వేర్లతో సహా తొలగించి స్వాధీనం చేసుకున్నారు. వీటి విలువ సుమారు రూ.12 లక్షలు ఉంటుందని పోలీసులు తెలిపారు.
కౌలు భూముల్లో అక్రమ సాగు
పోలీసుల వివరాల ప్రకారం.. గాంధారి శివారులోని సర్వే నంబర్ 110/ఆ 2/2లో 3 ఎకరాల 26 గుంటల భూమిని కౌలుకు తీసుకున్న మంజ సోనుసింగ్, మంజ మద్దిబాయి అనే భార్యాభర్తలు సుమారు 250 గంజాయి మొక్కలను సాగు చేస్తున్నట్లు గుర్తించారు.
అదే ప్రాంతంలోని సర్వే నంబర్ 110/అలో 1 ఎకరం 20 గుంటల భూమిని కౌలుకు తీసుకున్న బస్సి జోద్రాజ్ అనే వ్యక్తి సుమారు 150 గంజాయి మొక్కలను సాగు చేస్తున్నట్లు పోలీసుల విచారణలో వెల్లడైంది.
ముగ్గురు అరెస్ట్.. రిమాండ్కు తరలింపు
అక్రమంగా గంజాయి సాగు చేస్తున్నట్లు గుర్తించిన పోలీసులు సంబంధిత వ్యక్తులను అదుపులోకి తీసుకుని అరెస్ట్ చేశారు. వారి వద్ద నుంచి గంజాయి సాగుకు ఉపయోగించినట్లు పేర్కొన్న మొబైల్ ఫోన్లను స్వాధీనం చేసుకుని కేసు నమోదు చేశారు. అనంతరం నిందితులను రిమాండ్కు తరలించినట్లు పోలీసులు తెలిపారు.
మాదకద్రవ్యాలపై ప్రత్యేక నిఘా
ఈ ఘటనపై సదాశివనగర్ సర్కిల్ కార్యాలయంలో నిర్వహించిన విలేకరుల సమావేశంలో ఎల్లారెడ్డి డీఎస్పీ శ్రీనివాస్ రావు వివరాలు వెల్లడించారు. కామారెడ్డి జిల్లా వ్యాప్తంగా గంజాయి, ఇతర మాదకద్రవ్యాల అక్రమ సాగు, విక్రయాలు, రవాణాపై ప్రత్యేక నిఘా కొనసాగిస్తున్నట్లు తెలిపారు.
ఎవరైనా మాదకద్రవ్యాలను అక్రమంగా సాగు చేసినా, విక్రయించినా, రవాణా చేసినా లేదా ప్రోత్సహించినా చట్ట ప్రకారం కఠిన చర్యలు తీసుకుంటామని డీఎస్పీ హెచ్చరించారు. యువతను మాదకద్రవ్యాలకు దూరంగా ఉంచేందుకు ప్రజలు కూడా పోలీసులకు సమాచారం అందించి సహకరించాలని కోరారు.
